လ ျှပ်စစ်ဓာတ်အားခ တန်းတူကင်းလွတ်ခွင့်နှင့် ပတ်သက်သည့် ထုတ်ပြန်ချက်

လ ျှပ်စစ်ဓာတ်အားခ တန်းတူကင်းလွတ်ခွင့်နှင့် ပတ်သက်သည့် ထုတ်ပြန်ချက်

(ရက်စွဲ - ဧပြီ ၉၊ ၂၀၂၀)

၁။ မြန်မာနိုင်ငံအတွင်းရှိ ပြည်သူများ၊ ဘာသာရေး အဖွဲ့အစည်းများနှင့် ပြည်တွင်း လူမှုရေး အဖွဲ့အစည်းများ အတွက် အိမ်သုံးအမျိုးအစား လျှပ်စစ်ဓာတ်အားသုံးစွဲမှု ၁၅၀ ယူနစ်အထိကို ငွေကြေး ကောက်ခံမှု ကင်းလွတ်ခွင့် (အခမဲ့) ဧပြီလကုန်အထိ ပေးအပ်သွားမည်ဖြစ်ကြောင်း Coronavirus Disease 2019 (Covid-19) ကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီက ဧပြီလ ၆ ရက်နေ့တွင် သတင်းထုတ်ပြန်ထားသည်။

ယင်းနှင့် ပတ်သက်၍ ပြည်ထောင်စုအစိုးရက ဖြန့်ဖြူးပေးသည့် လျှပ်စစ်ဓာတ်အား ရရှိနေသော ပြည်သူများအတွက် ခံစားခွင့်ကို လျှပ်စစ်နှင့် စွမ်းအင်ဝန်ကြီးဌာနက အသေးစိတ် ထုတ်ပြန်ထားပြီးဖြစ်သည်။ ယင်းအပြင် သက်ဆိုင်ရာ တိုင်းဒေသကြီးနှင့် ပြည်နယ် အစီအစဉ်ဖြင့် လျှပ်စစ်ဓာတ်အား ဖြန့်ဖြူးပေးနေသည့် မီးသုံးစွဲသူများ အတွက် သက်ဆိုင်ရာ တိုင်းဒေသကြီးနှင့် ပြည်နယ် အစိုးရ၏ အစီအစဉ်ဖြင့် သီးခြား ဆောင်ရွက်ရန် ဖြစ်ကြောင်း ထုတ်ပြန် အသိပေးထားသည်။

၂။ တနင်္သာရီတိုင်းဒေသကြီးမှ ပြည်သူများကို ပြည်ထောင်စု အစိုးရ၏ အစီအစဉ်ဖြင့် မဟုတ်ဘဲ တိုင်းဒေသကြီး အစိုးရ အဖွဲ့၏ သီးခြား အစီအစဉ်ဖြင့် လျှပ်စစ်ဓာတ်အားဖြန့်ဖြူးပေးလျက်ရှိသည်။ ယင်းကြောင့် တနင်္သာရီတိုင်းဒေသကြီးရှိ ပြည်သူများမှာ Coronavirus Disease 2019 (Covid-19) ကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီက ပေးအပ်ထားသော မီတာခကင်းလွတ်ခွင့်ကို တနင်္သာရီတိုင်းဒေသကြီး အစိုးရ၏ အစီအစဉ်ဖြင့် ခံစားခွင့်ရမည့် သဘောဖြစ်သည်။

၃။ သို့သော် တနင်္သာရီတိုင်းဒေသကြီး အတွင်း ပြည်သူများ မည်သို့သော ပုံစံဖြင့် လျှပ်စစ်ဓာတ်အားခ အခြေခံယူနစ်ကင်းလွတ်ခွင့် ရရှိမည်ဖြစ်ကြောင်း ဧပြီလ ၉  ရက်နေ့ နံနက်ပိုင်းအထိ တနင်္သာရီတိုင်းဒေသကြီး အစိုးရအဖွဲ့က ရှင်းရှင်းလင်းလင်း ထုတ်ပြန်အသိပေးခြင်း မရှိသေးပါ။

၄။ တနင်္သာရီတိုင်းဒေသကြီးမှ ပြည်သူများသည်လည်း မြန်မာနိုင်ငံအတွင်း နေထိုင်သော အခွန်ထမ်း တိုင်းရင်းသားပြည်သူများ ဖြစ်သည်နှင့် အညီ နိုင်ငံတော်အစိုးရက ပေးအပ်ထားသော ဧပြီလအတွင်း လျှပ်စစ်ဓာတ်အားငွေကြေးကောက်ခံမှု ကင်းလွတ်ခွင့်ကို အခြားတိုင်းဒေသကြီးနှင့် ပြည်နယ်များမှ ပြည်သူများနည်းတူ ခွင့်တူညီမျှ တန်းတူခံစားခွင့်ရှိပါသည်။

၅။ ယင်းကြောင့် တနင်္သာရီတိုင်းဒေသကြီးအတွင်းရှိ ပြည်သူများ လျှပ်စစ်ဓာတ်အားခ တန်းတူ ကင်းလွတ်ခွင့် ရရှိရေး တနင်္သာရီတိုင်းဒေသကြီး အစိုးရ အဖွဲ့ အနေနှင့် အထူးအလေးပေး စီစဉ်ဆောက်ရွက်ရန် နှင့် ယင်းအစီအစဉ်ကို ပြည်သူများသို့ အမြန်ဆုံး ရှင်းလင်းတင်ပြရေး ထားဝယ်တိုင်းရင်းသားများပါတီက ထုတ်ပြန်တိုက်တွန်းလိုက်ပါသည်။

ထားဝယ်တိုင်းရင်းသားများပါတီ (ဗဟို)
ထားဝယ်မြို့။